Monday, January 25, 2021
FOLLOW US ON

Poem

ਆਵਾਜ਼ - ਰੂਪ ਲਾਲ ਰੂਪ

January 13, 2021 11:40 PM
ਆਵਾਜ਼ 
    *
ਹੱਕ ਅਤੇ ਸੱਚ ਦੀ ਆਵਾਜ਼ ਬਣ ਕੇ, 
ਨੀ ਕਿਸਾਨ ਦਿੱਲੀਏ ।
ਬੈਠੇ ਤੇਰੇ ਦਰਾਂ ਉੱਤੇ ਹਿੱਕ ਤਣ ਕੇ, 
ਇਕ ਜਾਨ ਦਿੱਲੀਏ ।
ਧਰਤੀ ਦੇ ਪੁੱਤ ਨਾ ਲੁਟੇਰੇ ਦਿੱਲੀਏ,
ਦਬਕੇ ਤੂੰ ਮਾਰਦੀ ।
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ, 
ਜੰਗ ਆਰ ਪਾਰ ਦੀ ।
 
ਰੋਕਿਆ ਵਥੇਰਾ ਸੜਕਾਂ ਵੀ ਪੁੱਟੀਆਂ,
ਆਏ ਧੂੜਾਂ ਪੱਟ ਕੇ ।
ਭੰਨ ਤੋੜ ਰੋਕਾਂ ਦਰਿਆਵੀਂ ਸੁੱਟੀਆਂ, 
ਕੈਂਚੀ ਵਾਗੂੰ ਕੱਟ ਕੇ ।
ਜੋਰ ਦੇਖੇ ਕਰ ਕੇ ਵਥੇਰੇ ਦਿੱਲੀਏ, 
ਨੀ ਤੂੰ ਗਈ ਹਾਰਦੀ ।
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ,
ਜੰਗ ਆਰ ਪਾਰ ਦੀ ।
 
ਪਾਣੀ ਦੀਆਂ ਤੋਪਾਂ ਚਲਾਈਆਂ ਬੜੀਆਂ, 
ਹਿੱਕ ਤਾਣ ਜਰੀਆਂ ।
 ਹੰਝੂ ਗੈਸ ਵਾਲੀਆਂ ਲਾਈਆਂ ਝੜੀਆਂ,
ਫੌਜਾਂ ਨਹੀਂ ਡਰੀਆਂ ।
ਸ਼ੇਰਾਂ ਨਾਲੋਂ ਵੱਡੇ ਸਾਡੇ ਜੇਰੇ ਦਿੱਲੀਏ ,
ਗੱਲ ਨਾ ਹੰਕਾਰ ਦੀ।
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ ,
ਜੰਗ ਆਰ ਪਾਰ ਦੀ ।
 
ਉਚਿਆਂ ਘਰਾਣਿਆਂ ਨ' ਲਾ ਕੇ ਯਾਰੀਆਂ, 
ਡੋਬਦੀ ਕਿਸਾਨੀ ਨੂੰ ।
ਚਾਹੁੰਦੀ ਹੜੱਪਣਾ ਜ਼ਮੀਨਾਂ ਸਾਰੀਆਂ, 
ਰੋਲ ਕੇ ਜਵਾਨੀ ਨੂੰ ।
ਪੁੱਟੀ ਜਾਵੇਂ ਖਾਬਾਂ ਦੇ ਬਨੇਰੇ ਦਿੱਲੀਏ,
ਗੱਲ ਨਾ ਵਿਚਾਰਦੀ।
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ,
ਜੰਗ ਆਰ ਪਾਰ ਦੀ ।
 
ਪੋਹ ਦੀਆਂ ਰਾਤਾਂ 'ਚ ਕਿਸਾਨ ਠਰਦਾ, 
ਬੈਠੀ ਝੁੰਬ ਮਾਰ ਕੇ ।
ਬਾਲ ਬੱਚਾ ਆ ਗਿਆ ਹੈ ਨਾਲ ਘਰਦਾ,
ਤੈਥੋਂ ਅੱਕ ਹਾਰ ਕੇ ।
ਘਰੋ ਘਰੀ ਪਾਏ ਤੂੰ ਹਨੇਰੇ ਦਿੱਲੀਏ ,
ਚਮਕਾਰੇ ਮਾਰਦੀ, 
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ,
ਜੰਗ ਆਰ ਪਾਰ ਦੀ ।
 
ਕਾਲਿਆਂ ਕਾਨੂੰਨਾਂ ਤਾਈਂ ਰੱਦ ਕਰ ਦੇ ,
ਭਲਾ ਹੋਵੇ ਦੇਸ਼ ਦਾ ।
ਦੁਖਦੀ ਤੂੰ  ਰਗ 'ਤੇ  ਮਲਮ ਧਰਦੇ, 
ਖਾਤਮਾ ਕਲੇਸ਼ ਦਾ ।
ਗੱਲੀਂ ਬਾਤੀਂ ਮੁੱਕਣੇ ਨਾ ਘੇਰੇ ਦਿੱਲੀਏ,
'ਰੂਪ ' ਗੱਲ ਸਾਰ ਦੀ ।
ਇਕੋ ਨਾਹਰਾ ਗੂੰਜਦਾ ਚੁਫੇਰੇ ਦਿੱਲੀਏ,
ਜੰਗ ਆਰ ਪਾਰ ਦੀ ।
                   *
                ਰੂਪ ਲਾਲ ਰੂਪ 
Have something to say? Post your comment